NEWS LINE
22:15 14 октября 2015, Вт.
1 °C, Ашберн Usd: eur:
96 0 комментариев

Прыхільнікаў Вайшнорыі запрашаюць адзначыць Дзень адзінства балтаў

Сёлета ў Беларусі Дзень адзінства балтаў адзначаць у больш чым 20 мясцінах.

Аб гэтым сайту Сharter97.org паведамiў адзiн з арганiзатараў свята. Штогод Беларусь далучаецца да святкавання Дня адзінства балтаў. Гэты дзень прыпадае на восеньскае раўнадзенне, 22 верасня. Святкуюць, запальваючы вогнішчы па гарах і пагорках роўна ў адзін час, паміж 8-й і 9-й гадзінамі вечара.

Дзень адзінства балтаў прызнаны дзяржаўным святам у Літве і Латвіі. Яго гістарычная падстава - калі аб'яднаныя войскі продкаў літоўцаў і латышоў разбілі крыжакоў у 1236-м. Без той перамогі Вялікаму Княству Літоўскаму было б цяжэй узняцца, кожная такая перамога давала час, каб сабраць сілы і арганізавацца. Тая "Бітва пры Саўле" стаіць у адным шэрагу з Грунвальдам.

Але Дзень адзінства балтаў нясе яшчэ адзін сэнс. Яго ў сваім часе падкрэсліў адзін з лідараў літоўскай "Рамувы" Ёнас Вайшкунас. Восеньскае раўнадзенне - час, калі дзень робіцца карацейшым, а ноч - даўжэйшай. Гэты час - на паўдарозе ад Купалля, калі "свет" максімальна пашыраецца і мы ідзем у прыроду ды святкуем на пагорках, да Калядаў, калі "свет" звужаецца да памераў свайго жытла. Восеньскае раўнадзенне - калі чалавек пераходзіць ад актыўнасці да задуменнасці, калі задумляецца над тым, што мае ўнутры. Звяртаецца да сябе, прыгадвае тых, дзякуючы каму жыве, - продкаў. Нездарма ў латышоў "Месяцам дзядоў" называўся ўвесь кастрычнік.

Гэта час падвядзення вынікаў, час падліку. І таго, што зроблена за актыўны летні час. І таго, колькі нас - сяброў, адзінадумцаў, паплечнікаў. Таму на пагорках на Дзень адзінства балтаў у адзін і той жа час запальваюцца вогнішчы. Вялікая супольнасць адзінадумцаў набрыняе сіламі, каб перажыць халодную і цёмную пару года.

Сёлета ў Беларусі Дзень адзінства балтаў адзначаць у больш чым 20 мясцінах. Вогнішчы будуць палаць не толькі на паўночным захадзе, але і на процілеглых канцавінах краіны (Віцебск, Орша, Магілёў, Гомель, Пінск). Для кагось гэта стане зусім адкрыццём, але запаляць агні таксама яшчэ больш на ўсход - на Цвершчыне, пад Масквой (там, дзе жыла голядзь), на Смаленшчыне. І нават пад Варонежам і ва ўкраінскім Жытоміры. Вось такім вялікім калісьці быў абшар, дзе размаўлялі на балцкіх гаворках.

У гэтым годзе Дзень адзінства балтаў праходзіць "пад гукі кананады" расійска-беларускіх вайсковых вучэнняў. І гэта два зусім розныя вектары: адзін прывязвае нашую краіну да Расіі з яе імперскай і славянскай ідэяй, другі - звяртае да каранёў, да часоў ВКЛ і нават ранейшага часу.

Шмат хто ў гэтыя дні, пратэстуючы, выказвае прыхільнасць да "Вайшнорыі". Гэта назва прыдуманая, але ў яе аснове - нашая балцкая старажытнасць. Памыляюцца тыя, хто глядзяць на "Вайшнорыю" як на ідэю сепаратызму. "Духоўная Вайшнорыя" - яна над Беларуссю. Менавіта з гэтай крыніцы возьмуць сілаў тыя, хто бярэ ўдзел у сёлетнім Дні адзінства балтаў.

Паглядзець, дзе будуць 22 верасня ўвечары запальвацца агні, паведаміць пра свой удзел або далучыцца да тых, хто ўжо ўдзельнічае, можна тут.

Источник: Хартыя'97

Теги: